Cebuano News: Bohol nakadawat og 177 units ka farm machineries gikan sa RCEF

SA PAGPALAPAD SA UMAHAN NGA MATUBIGAN. Gibuksan nila ni DA RED Salvador Diputado (left) ug Kongresista Alexei Tutor ug Mayor Dodi Maestrado ang dyutay nga sistema sa patubig didto sa Sierra Bullones nga magpatubig sa duhang usa ka gatus ka ektarya nga basakan, aron mapadaghan ang ani sa humay nunot sa pagdagsang sa imported nga humay dinhi, pagpatuman usab sa RCE. (PIA Bohol)  

TAGBILARAN CITY, Oct. 13 (PIA) -- Ang Department of Agriculture sa Rehiyon 7 (DA-7) nitugyan ning bag-o lang, sa lalawigan sa Bohol sa kinatibuk-ang 177 ka units sa nagkalain-laing mga makinarya sa pang-uma gikan sa Rice Competitiveness Enhancement Fund (RCEF).

Kining mga makinarya sa pang-uma gihatag sa sa Philippine Center for Postharvest and Mechanization (PhilMech) sa DA nga naglakip sa 16 units ka 4WD Tractor, 39 ka Hand Tractors, 47 ka Floating Tillers, 1 Rice Precision Seeder, 13 ka Walk Behind Transplanters, 4 Riding Type Transplanters, 17 Rice Reapers, 13 Rice Combined Harvesters, 21 Mini Rice Threshers, ug 7 ka Mobile Rice Mills.

Baynte-dos ka farmer associations (FAs) ang giila isip recipient o nakadawat sa maong mga makinarya sa uma.

Ang maong mga FAs gikan sa mga lungsod sa Calape, Catigbian, Buenavista, Dagohoy, Danao, Trinidad, Ubay, Alicia, Batuan, Bilar, Candijay, Carmen, Duero, Garcia Hernandez, Sierra Bullones, ug Valencia.

Matud pa ni DA-7 regional executive director Salvador D. Diputado nga kining ‘farmer-empowerment’ nga inisyatiba ni Kalihim William Dar makigbugno sa pagdagsang sa  imported nga bugas ubos sa Rice Tariffication Law (RTL).

Gidugang pa ni Diputado nga ang pagapud-apod sa makinarya sa uma parte sa ‘farm mechanization component’ sa P10 bilyong Rice Competitiveness Enhancement Fund (RCEF) nga nagsiguro sa mga mag-uuma sa nasod nga mahatagan og paagi sa pagpaubos sa gasto sa produksyon ug mapaayo ang ani sa uma.

Ang PhilMech, ubos sa mechanization component sa RCEF, gitahasan sa paghatag sa gikinahanglang mga makinarya sa pang-uma sa tanang rice-producing municipalities sa nasod.

Gisaksihan ang turnover ceremony nga gipahigayon niadtong Oktubre 9 sa Bohol Agricultural Promotion Center (APC) sa syudad sa Tagbilaran nilang Bohol 1st District Cong. Edgar Chatto, 2nd District Cong. Erico Aristotle Aumentado, representante ni 3rd District Cong. Kristine Alexie Tutor, Provincial Agriculturist Dr. Larry Pamugas nga nagrepresentar ni Gobernador Arthur Yap, ug Jai Hinautan nga representante usab ni Senador Cynthia Villar. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments